Verður ein varandi og trygg loysn á ferðsluviðurskiftunum við Streymin framd í hesum samgonguskeiðinum?

Tað vil Haraldur Símunarson Hammer, løgtingsmaður, hava svar upp á frá Jacob Vestergaard, landsstýrismanni í vinnumálum.

Í einum skrivligum fyrispurningi, sum er dagfestur í dag, setur hann landsstýrismanninum tríggjar spurningar um ferðsluviðurskiftini á staðnum.

Hann spyr, um pengar verða settir av til endamálið á fíggjarlógini fyri 2027, og um landsstýrið er sinnað at projektera eina rundkoyring sum varandi loysn. Harumframt vil hann vita, um landsstýrismaðurin ætlar at raðfesta og fremja eina trygga loysn í samgongutíðarskeiðinum.

Í viðmerkingunum vísir Haraldur Símunarson Hammer á, at fleiri álvarslig ferðsluóhapp hava verið við Streymin, og at fólk eisini hava latið lív.

Hann lýsir ferðsluviðurskiftini sum eina deyðsfellu og vísir á, at ymiskar meiningar hava verið um, hvør loysn er tann besta. Partarnir hava ikki altíð verið samdir.

Sambært løgtingsmanninum vísir nýggjasta samskiftið millum kommununa og Landsverk, at ein politisk játtan er avgerandi fyri at koma víðari við málinum.

Hóast kommunan, Landsverk og aðrir partar møguliga kunnu semjast um eina rundkoyring, verður sambært viðmerkingunum ikki arbeitt víðari, fyrr enn pengar eru tøkir til endamálið.

– Tískil stendur málið í stað, inntil politisk játtan fyriliggur, skrivar Haraldur Símunarson Hammer.