Tá ið EB/Streymur 31. august var í Sørvági, endaði tað 1-1. Ta ferðina vardi Silas Eyðsteinsson málið hjá EB/Streymi, sum hevði leigað málverjan úr B36. EB/Streymur hevur annars leigað Steven Van Dijk frá 07 Vestur, men ímóti EB/Streymi var hann á beinkinum hjá 07 Vestur.
Í gjár var Silas Eyðsteinsson sannur brandur í B36 málinum í 1. deild. B36 vann 1-0, og Silas Eyðsteinsson bjargaði fleiri ferðir, tá ið mótstøðuliðið var í góðum støðum.
Men í dag verður tað Steven Van Dijk, sum fer at verja málið hjá EB/Streymi. Í gjár sat á beinkinum, tá ið 07 Vestur í bestu deildini vann 3-0 í Fuglafirði.
Hjá EB/Streymi kemur tað stak illa við, at Bogi Reinert-Petersen undir venjing í vikuni varð skaddur í knænum. Talan er um liðbandsskaða, sum tað verður sagt fer at halda honum uttanfyri í nakrar vikur. Bogi Reinert-Petersen hevur annars seinastu ferðirnar og saman við Filip Djordjevic verið partur av væl uppløgdum álopspari.
Tóki H. Johannesen, sum hevur verið skaddur síðani í mai, er um at vera tøkur aftur.
B36 er næstfremst, og B36 hevur fýra tær seinastu ferðirnar vunnið fulla úrtøku við samantalda malmuninum 10-0. Um tað fer at eydnast B36 at vinna fulla úrtøku í Hólmanum seinnapartin, so verður frástøðan aftur til HB fimm stig. Týskvøldið fær HB vitjan av Víkingi, og so verður grannauppgerð í Gundadali um eina viku.
Hjá B36 er Sonni Ragnar Nattestad tøkur aftur eftir leikbann. Magnus Egilsson er leikbannaður, og Benjamin Heinesen er darvaður av skaða í knænum.
EB/Streymur – B36: Alex Troleis kl. 15.00.
