– Eg dugi ikki at ímynda mær, at vit ikki fara at gera tað sama.

Soleiðis sigur Lars Fodgaard Møller, landslækni, nú vit spyrja hann, um allir føroyingar eins og danir eisini fara at fáa tilboð um eitt triðja prik.

Í áðni boðaði Magnus Heunicke, danskur heilsumálaráðharri frá, at allir danir fara at fáa í boði eitt triðja prik.

– Eg rokni við, at vit fara at fylgja dønum. Tað hevði undrað meg nógv, um vit ikki gjørdu tað. Men hetta er ikki avgjørt enn. Vit fara at hava ein fund týsdagin, sigur Lars Fodgaard Møller og leggur dent á, at hetta er ein politisk avgerð.

So er spurningurin, hvat Kaj Leo Holm Johannesen, heilsumálaráðharri, heldur um hetta. Hann hevur longu sagt ja til eitt triðja prik til fólk við nógv niðursettari immunuverju. Higartil hava 159 fólk fingið triðja prikið í Føroyum. Men hann dugir enn ikki at siga, hvat hann roknar við tiðja prikinum viðvíkjandi.

– Vit hava ikki tikið støðu til hetta enn. Men vit fara at taka tað upp, sigur hann í stuttari viðmerking.

Landslæknin heldur tað vera eina gongda leið at bjóða øllum føroyingum eitt triðja prik.

– So verða vit betur vard, serliga fyri serliga delta variantinum, so tað gevur meining, sigur Lars Fodgaard Møller.