Í dag er stórur dagur á Tvøroyri. Tað eru 130 ár síðani, at elsta ítróttarfelagið í landinum varð stovnað, og ein partur av hátíðarhaldinum hevur longu verið í Trongisvági. Eftir skrúðgongu og sang og tónleik úr skúlanum og vestur á vøllin var landskappingardystur millum TB og næstbesta liðið hjá HB.

TB vann 1-0. Umframt landskappingardyst var talan um steypadyst, og nú hava umboðini fyri 130 ára gamla felagið fingið steyp handað.

Einasta málið í dag skoraði ein av ungu og evnaríku TB spælarunum. Stórur hálvur tími var farin, tá ið Jóhan Renéson Thomsen setti bóltin í netið eftir upplegg frá Mikkel Blåholm. Hetta var vorðið sum føðingardagsgáva hjá Jóhan Renéson Thomsen, sum í morgin fyllir 20 ár. Hetta var aðru ferð í ár, at hann var málskjútti. Í fjør skoraði hann fram ímóti kappingarenda mál í trimum teimum síðstu landskappingardystunum hjá TB í bestu deildini.

1-0 sigurin ímóti HB ber við sær, at TB er næstfremst við 21 stigum – tvey stig aftanfyri ÍF og sjey stig frammanfyri Víking, sum er á triðja plássi.

Mikukvøldið verður aftur fótbóltur við Stórá í Trongisvági. Tá fær TB vitjan av 07 Vestur í bestu deildini. Tá verður fjórðingsfinala í kappingini um løgmanssteypið.

130 ára haldið hjá TB heldur fram í miðbýnum á Tvøroyri klokkan 18 í kvøld.