Danska løgmálaráðið bíðar í løtuni eftir eini formligari umbøn um at fáa Paul Watson útflýggjaðan til Japan, har hann er eftirlýstur fyri ymisk brotsverk framd í 2010. Eisini Interpol sendi út boð um at handataka Paul Watson í 2012.
Tað skrivar danska kringvarpið, DR.
– Løgmálaráðið bíðar nú eftir eini formligari umbøn frá japansku myndugleikunum. Ein slík skal vera latin inn seinast 30 dagar eftir handtøku, sigur danska løgmálaráðið í skrivarlig viðmerking til DR. Ein rættarfundur er longu settur á skrá í august, har støða skal takast til møguliga útflýggjan.
Paul Watson varð herfyri handtikin í Grønlandi, og sambært DR, so vóru tað júst handtøkuboðini úr Japan, sum fingu Grønlands Politi at handtaka tann 73 ára gamla kanadiumannin, sum føroyingar kenna væl.
Verjin hjá Paul Watson hevur longu ført fram, at útflýggjan til Japan ikki kann koma uppá tal, tí at hetta vildi verið í stríð við evropeiska mannarættindasáttmálan, tí Japan ikki á nøktandi hátt verjir mannarættindini.
