Frá oktober í fjør til september í ár vórðu 14,2 milliardir krónur útgoldnar í lønum í Føroyum. Tað eru 772 milliónir meira enn undanfarna 12 mánaðarskeið, vísa nýggj tøl hjá Hagstovu Føroya.

Serliga botnfiskiveiðan dró samlaðu lønarútgjaldingarnar uppeftir. Í botnfiskiveiðu vuksu tær 188 milliónir krónur, meðan vøksturin í botnfiskiveiðu við virking umborð var 63 milliónir. Tilsamans svarar tað til 32 prosent av samlaða vøkstrinum.

Hinvegin minkaðu lønarútgjaldingarnar í uppsjóvarveiðu 64 milliónir krónur, ella 10,4 prosent. Í aling var afturgongdin 12 milliónir krónur.

Menn fingu 62 prosent av øllum útgoldnu lønunum og áttu 68 prosent av vøkstrinum. Samlaðu lønarútgjaldingarnar til menn vuksu 6,4 prosent og til kvinnur 4,7 prosent.

Vøksturin var størri hjá arbeiðsgevarum undir privatum ræði, har hann var sjey prosent. Undir almennum ræði var vøksturin 3,9 prosent.

Landafrøðiliga var størsti vøksturin hjá fólki búsitandi í Sandoyar øki, har lønarútgjaldingarnar vuksu 13 prosent. Norðurstreymoyar øki hevði minsta vøksturin við trimum prosentum.

Kelda: Hagstova Føroya.