- Sum skilst er partafelagið, Gráastein Sp/f, sum eigur uppsjóvarskipið Biritu TN 132, selt. Keypsprísurin er onkunstaðni millum 250 og 300 milliónir krónur, frættist.
Soleiðis skrivar heimasíðan hjá Føroya Fiskimannafelag í dag.
- Keypararnir eru eitt felag aftanfyri uppsjóvarskipið, Vestmenning, sum fer at eiga 40 prosent og eitt felag aftanfyri uppsjóvarskipið Arctic Voyager í Hvalba, sum fer at eiga 60 prosent.
Heimasíðan vísir á, at Birita er ikki eitt gamalt skip í føroyska flotanum. Tað kom á Havnina í november í 2021. Skipið kallaðist tá Havfisk og var keypt úr Noregi.
- Í november í 2025 var ætlan at selja Biritu. Tá skrivaði Frihedsbrevet, at trý reiðarí høvdu ætlanir at bjóðað 258 milliónir krónur, men hetta kom ikki so langt.
Heimasíðan veit at siga, at herfyri var ætlanin, at Gráastein Sp/f skuldi uppí eitt stórreiðari.
- Kappingareftirlitið hevði tá góðkent, at Ango, Gráastein og helvtin av felagnum Kinnfelli, sum nú eitur smápartafelagið 7. mai 2026, skuldu leggja saman í eitt felag.
Lagt verður aftrat, at fyri Gráastein Sp/f bleiv hetta av ongum.
- Eftir tí, sum frættist, er framhaldið av søguni, at Gráastein Sp/f, sum eigur Biritu, nú er selt til tvey feløg, eitt í Vestmanna og eitt í Hvalba, skrivar heimasíðan hjá Føroya Fiskimannafelag.
