Í minsta lagi 24 fólk lótu lív, tá ein bussur í gjár stoytti saman við ein lastbil á einum høvuðsvegi í Kenja.

Útlendskir miðlar vita at siga, at fyri bara tveimum vikum síðan lótu 17 fólk lív í einari aðrari ferðsluvanlukku á sama vegastrekki.

Sagt verður, at vegurin er bindingarlið millum høvuðsstaðin Nairobi og strandarbýin, Mombasa.

Umframt tey 24, sum lótu lív í vanlukkuni bussvanlukkuni í Kenja í gjár, fingu á leið líka nógv fólk løstir í vanlukkuni.

Útlendskir miðlar vita í morgun at siga, at ferðafólkini í bussinum vóru á veg heim aftur til Mombasa eftir at hava verið til eina jarðarferð hjá einum presti.

Júst, hvussu vanlukkan hendi, er ikki full greiða fingin á, men eitt av ferðafólkunum sigur, at ein lastbilur rakti bussin aftanífrá, og bussurin koppaði í samanstoytinum.

Ferðslumyndugleikarnir í Kenja hava illgruna um, at vanlukkan stóðst av ábyrgdarleysari yvirháling, sum sagt verður.

Høg ferð og vánaligir vegir hava áður verið nevnd sum viðvirkandi orsøkir til fleiri ferðsluvanlukkur í Kenja.

Myndugleikarnir í landinum siga, at hvørt ár doyggja umleið 5000 fólk í ferðsluni, og talið av ferðsluvanlukkum í Kenja liggur um 20.000 um árið.