Higartil eru 35 fólk funnin deyð, eftir at eldur kom í eina ferju á Filipsoyggjunum, men myndugleikarnir í landinum stúra fyri, at talið av deyðum fer at veksa.
Stutt eftir eldin vórðu fimm fólk staðfest deyð, men talið vaks skjótt og kom upp á 30. Nú er talið av deyðum komið upp á 35.
- Stúrt verður fyri, at talið av deyðum fer at veksa uppaftur meira, sigur vaktartænastan á Filipsoyggjunum.
Sagt verður, at 30 ferðafólk og 13 av manningini vórðu bjargað á lívi, samstundis sum tilsamans 54 fólk vóru saknað.
Men, sambært ferðafólkalistanum vóru tilsamans 134 fólk við MV June Aster - 117 ferðafólk, og manningin taldi 17.
Bjargingartænastan veit at siga, at tvey fólk vóru ongantíð farin umborð á ferjuna.
Ferjan var hósdagin farin úr Baseco í Manila, og hon skuldi til Coron í landslutinum, Palawan.
Eldurin kyknaði í lastini, áðrenn ferjan kom til Coron, og sagt verður, at eldurin fór um alt skipið eftir lítlari løtu.
Tað er ógreitt, hví eldur kom í MV June Aster.
