Samuel Chukwudi og liðfelagarnir í SV Ried høvdu fína vitjan í kvøld í bestu eysturríksku fótbóltsdeildini.
Toppliðið, Red Bull Salzburg var á vitjan á Innviertel Arena í Ried. Frammanfyri 6.041 áskoðarum knógvaðu Samuel og liðfelagarnir javnleik 1-1 móti Salzburg, ið kann staðfestast at vera eitt gott úrslit hjá undirtippaða heimaliðnum.
Leingi sá tað út til, at dysturin fór at enda við javnleiki 0-0, men móti dystarenda funnu liðini fýrverkið fram. Klokkan vísti 84 minuttir, tá Karim Konaté við einum hørðum og væl plasseraðum skoti legði Salzburg á odda 1-0. Tað gingu bert tveir minuttir, so svaraði Ried aftur við góðum hornasparki, ið Philipp Pomer stútaði í netið.
Ried er nummar átta í deildini við fimm stigum fyri seks dystir. LASK Linz er fremst í deildini við 15 stigum, og Red Bull Salzburg er næstfremst við 14 stigum.
Sunnudagin 20. september hevur SV Ried aftur dyst á heimavølli. Tá kemur Wolfsberger AC á vitjan.
