Í kvøld spældi Maria á fyrsta sinni dyst fyri Keypmannahavn móti sínum gomlu liðfeløgum í Horsens í dysti í bestu donsku hondbóltsdeildini.
Í Frederiksberg-høllini eydnaðist tað Keypmannahavn at vinna tepran 30-29 sigur á Horsens. Í steðginum var heimaliðið eisini frammanfyri við einum máli. Tá var støðan 16-15.
Maria skoraði fýra mál upp á sjey málroyndir. Hon legði eisini upp til fimm mál, og hon vann liðnum eitt brotskast.
Keypmannahavn hevur seks stig fyri fýra teir fyrstu dystirnar.
Sunnudagin klokkan 17 verður føroyingauppgerð. Tá taka Jana Mittún og liðfelagarnir í Viborg móti Rakul Wardum og hennara liðfeløgum í Skanderborg.
