Ein vaksandi partur av útgjaldinum úr fiskavirkisskipanini fer til útlendingar. Fyrstu níggju mánaðirnar í 2026 var parturin 42 prosent, samanborið við 10 prosent í 2016.
Tað vísir eitt svar frá Margit Stórá, landsstýriskvinnu, til ein skrivligan fyrispurning frá Liljan Weihe, løgtingskvinnu, um fiskavirkisskipanina og útlendingar.
Higartil í ár eru góðar 13 milliónir krónur goldnar úr skipanini. Av hesum eru slakar 5,5 milliónir farnar til útlendingar og 7,6 milliónir til danskar ríkisborgarar, sum eisini fevna um føroyingar.
Í 2025 fingu útlendingar knappar 5,4 milliónir krónur úr skipanini. Tað svaraði til 37 prosent av samlaða útgjaldinum. Í 2024 var parturin 40 prosent.
Útlendingar fylla eisini alsamt meira í ársverkunum í fiskavirkisskipanini. Í 2016 vóru 170 av teimum 1.301 ársverkunum knýtt at útlendingum, svarandi til 13 prosent. Í 2025 var talið 534 ársverk og parturin 40 prosent.
Fyri umleið fyrstu níggju mánaðirnar í ár eru 454 av tilsamans 1.023 ársverkum knýtt at útlendingum. Tað svarar til 44 prosent.
ALS ger vart við, at hetta eru ársverk og ikki tal á persónum. Av tí at útskifting er í skipanini, eru arbeiðstímarnir umroknaðir til ársverk við 1.824 arbeiðstímum um árið.
Í uppgerðini verða útlendingar skilmarkaðir sum persónar, ið sambært landsfólkayvirlitinum ikki eru ríkisborgarar í danska kongaríkinum. Ikki verður skilt millum fólk við tíðaravmarkaðum arbeiðsloyvi, varandi uppihaldsloyvi ella øðrum uppihaldsloyvum.
Samlað eru góðar 45 milliónir krónur goldnar útlendingum úr fiskavirkisskipanini frá 2016 til september í ár. Samlaða útgjaldið í tíðarskeiðinum er slakar 205 milliónir krónur.
Eftirløn og arbeiðsmarknaðargjøld eru ikki við í upphæddunum. Veruligu útreiðslurnar eru tí nakað hægri, verður upplýst í svarinum.
Kelda: Svar frá Margit Stórá, dagfest 13. oktober 2026, til § 52a-fyrispurning nr. 52-060/2026.
