Tíðindaskriv:

Í samband við hetta verður almennur fundur í miðhøllini á Skúlatrøð í Klaksvík klokkan 19-21, mánakvøldið 14. september 2026, sum er  á sjálvum 80 ára degnum fyri fólkaatkvøðuna.

Kvøldið byrjar við frágreiðingum frá Hans Andrias Sølvará, professara í søgu, og Magna Laksáfoss, PhD í føroyskum búskapi, har teir hyggja at, hvussu Føroyar hava flutt seg politiskt og búskaparliga hesi 80 árini.

Eftir hetta verður politiskt orðaskifti millum Beinir Johannesen, Aksel V. Johannesen, Sámal Petur í Grund, Sirið Stenberg, Steffan Klein Poulsen og Ruth Vang, sum eru forfólkini í teimum 6 flokkunum, sum hava sagt seg taka undir við tjóðarsemjuni.

Beinta Løwe, journalistur og stjórnmálafrøðingur, fer at stýra orðaskiftinum, har millum annað verður spurt, hvør kósin hjá Føroyum er nú 80 ár eftir fólkaatkvøðuna.

Høvi verður hjá áhoyrarum at seta spurningar og gera viðmerkingar.

Norðlýsið ljóðstroymir frá fundinum.

Norðoyar Tjóðveldisfelag