Lars Løkke Rasmussen, danskur uttanríkisráðharri, er varliga bjartskygdur um, at tað fer at bera til at fáa eina avtalu millum Danmark, Grønland og USA.
Tað segði hann fríggjadagin eftir ein fund í uttanríkispolitisku nevndini hjá Fólkatinginum. Har kunnaði hann nevndarlimirnar um samráðingarnar á høgum stigi, sum vórðu settar í gongd í januar, skrivar Ritzau.
Løkke leggur tó dent á, at samráðingar kunnu fara fyri bakka. Hann vísir millum annað til royndirnar at fáa eina handilsavtalu millum Kanada og USA, sum herfyri miseydnaðust.
– Tí eri eg sera afturhaldin við at geva mína endaligu meting av hesum. Vit hava onga avtalu, fyrr enn vit hava eina avtalu. Men tað er gott, at vit hava hetta samskiftið, sigur Lars Løkke Rasmussen.
Trump skal góðkenna avtaluna
Uttanríkisráðharrin heldur, at samskiftið gevur orsøk til eitt ávíst bjartskygni. Hann vísir tó á, at ein avtala at enda fer at krevja góðkenning frá amerikanska forsetanum.
Sambært Løkke skal ein endalig avtala taka atlit at tí, sum verður nevnt lóglig og rímilig amerikansk trygdaráhugamál, samstundis sum hon virðir mørkini, ið Grønland og Danmark hava sett.
Hann kann tó ikki siga nakað avgerandi nýtt um, nær arbeiðsbólkurin kann vera komin á mál.
Í juni segði Løkke við Politiken, at hann væntaði eina loysn innan árslok. Tá metti hann, at tørvur var á nøkrum fundum aftrat.
Arbeiðsbólkur settur í januar
Viðurskiftini millum USA og ávikavist Grønland og Danmark hava verið spent, eftir at Donald Trump fleiri ferðir hevur borið upp á mál, at USA skal yvirtaka Grønland, sum er partur av ríkisfelagsskapinum.
Arbeiðsbólkurin millum tey trý londini varð settur eftir ein fund í Washington í januar.
Tá var Vivian Motzfeldt, táverandi grønlendsk uttanríkisráðfrú, í USA saman við Lars Løkke Rasmussen. Tey hittu amerikanska varaforsetan, J.D. Vance, og uttanríkisráðharran, Marco Rubio.
Samráðingarnar halda fram, men enn hevur Løkke onga dagfesting fyri, nær ein avtala kann vera klár.
Kelda: Ritzau
