Vágs kommuna boðar frá, at býráðið í hesi vikuni fer undir at gera fíggjarætlanina fyri komandi ár.
Í nógv ár hevur tað verið siðvenja, at meirilutin í býráðnum hevur staðið fyri arbeiðinum.
Men nú er ætlanin, at bæði meiriluti og minniluti skulu taka lut í arbeiðinum við at leggja fíggjarligu karmarnar og raðfesta kommunalu útreiðslurnar.
Sambært borgarstjóranum er hetta møguliga fyrstu ferð í umleið 30 ár, at alt býráðið er við til at gera fíggjarætlanina.
Endamálið er at fáa eina breiðari tilgongd, har øll býráðsumboðini hava møguleika at gera sína ávirkan galdandi.
Tað upplýsir Vágs kommuna.
