Elbilarnir fylla alsamt meira í føroyska persónbilaflotanum.
Sambært uppgerðum hjá Akstovuni vóru 1.642 elriknir persónbilar skrásettir 1. januar 2024. Við støðuni 1. november í ár er talið komið upp á 3.474.
Tað eru 1.832 fleiri og meira enn ein tvífalding.
Í sama tíðarskeiði er parturin av persónbilaflotanum, sum er elrikin, farin úr 5,9 prosentum upp í 12,2 prosent.
Hyggja vit longur aftur, er munurin enn størri. Við ársbyrjan 2022 vóru 603 elriknir persónbilar skrásettir. Nú eru teir nærum seks ferðir so nógvir.
Samlaði persónbilaflotin er vaksin munandi minni í sama tíðarskeiði. Hann er farin úr 27.451 bilum við ársbyrjan 2022 upp í 28.586 nú.
Talan er sostatt bæði um fleiri bilar og eina broytta samanseting av bilaflotanum.
Vanligir bensin- og dieselbilar eru kortini framvegis í greiðum meiriluta. Samanlagt eru teir 21.956 í tali, svarandi til 76,8 prosent av øllum skrásettum persónbilum. Hybridbilar verða taldir í serligum bólkum.
