Fyrrverandi brasilski landsliðsliðskiparin, Carlos Alberto, andaðist í dag. Carlos Alberto fekk brádliga ein blóðpropp í hjarta, og doyði beinavegin, skriva brasilskir miðlar. 72 ára gamli Carlos Alberto arbeiddi fram til fyri tveimum døgum síðani sum fótbóltsviðmerkjari á brasilsku sjónvarpsstøðuni, Sport TV. Carlos Alberto var í 1970 ein týðandi partur av brasilska landsliðnum, sum vann HM í Meksiko. Tá spældi hann á liðið saman við Péle, Rivelino, Gerson og øðrum góðum monnum, og verður tað liðið mett sum eitt tað sterkasta landsliðið sum nakrantíð hevur spælt. Carlos Alberto spældi ongantíð í evropeiskum fótbólti sum klubb-leikari. Hann spældi nógv ár við Santos og Fluminese, har hann var við til at vinna meistaraheitið við báðum feløgunum. Aftaná fótbóltskarrieruna hevur hann eisini roynt seg sum venjari, har hann millum annað hevur vant Corinthians, Botafoto, Flamengo, umframt at hann hevur verið landsliðsvenjari hjá Oman og Aserbadjan. Allur heimurin hevur víst Carlos Alberto samkenslu í dag. Millum annað hevur týska legendan, Franz Beckenbauer, skriva á Twitter, at hann og konan, Heidi, eru skelkaði um deyðsboðini av Carlos Alberto. Franz Beckenbauer skrivar at Carlos Alberto var sum ein beiggi fyri hann, og var ein av hansara nærmastu vinmonnum.