Eitt ukrainskt álop elvdi í gjár til streymslit á Krim-hálvoynni, sum Russland tók frá Ukraina longu í 2014. Sagt verður, at álopið eisini førdi til, at íbúgvar mistu vatnveitingina.

Men, Ukraina leyp ikki bara á streym-og vatnveitingina í Krim í gjár.

Russiskir myndugleikar siga, at ein bylgja av ukrainskum dronum eisini vórðu sendar eftir málum í landssyningspartinum av Russlandi.

Tað veit tíðindastovan, AFP, at siga fyrrapartin.

Guvernørurin, sum Russland hevur sett á Krim-hálvoynni, Sergej Aksjonov, skrivar á Telegram, at tað er høvuðsstreymveitingin á oynni, sum er rakt.

- Tí eru avmarkingar settar á nýtsluna av el-og vatni, sigur hann.

Guvernørurin sigur tó einki um, hvussu umfatandi skaðarnir eru á streymveitingina eftir ukrainska álopið á hálvoynna, har umleið 2,5 milliónir fólk búgva.

Í morgun vita útlendskir miðlar eisini at siga, at fleiri russisk ídnaðaranlegg eru rakt av ukrainskum dronum í russiska býnum, Toljatti.

Tað upplýsir borgarstjórin í økinum á Telegram, og tað er AFP-tíðindastovan, sum endurgevur.

Sagt verður, at stóri bilaframleiðarin, Avtovaz og ammoniak-framleiðarin, Togliattiazot, hava stórt virksemi í russiska býnum, Toljatti.

Russiski borgarstjórin í økinum sigur tó einki um, hvørji støð eru rakt í ukrainsku dronuálopunum á býin.