Frá knapt klokkan 7.30 til nakað eftir klokkan 8.15 í gjár kannaði løgreglan ferðsluna á Skálafjarðarvegnum millum Effo og Kelduna. Á hesum vegastrekki er ferðmarkið niðursett frá 50 til 30 km um tíman.

Tríggir bilførarar vórðu steðgaðir fyri at koyra ov skjótt. Tveir vórðu máldir at koyra 64 kilometrar um tíman, og ein koyrdi 58 kilometrar um tíman.

Loyvda ferðin á strekkinum var 30 kilometrar um tíman, og allir tríggir bilførararnir kunnu vænta treytaða frádøming av koyrikortinum.

Løgreglan steðgaði eisini einum bili, har ikki øll børnini sótu rætt íbundin. Tað gav bilføraranum eitt klipp í koyrikortið.

Í Klaksvík vórðu tveir bilførarar tiknir fyri at tosa í handhildna telefon um hálvgum tólvtíðina í gjár. Báðir fingu eitt klipp í koyrikortið.