Bæði í ár og í fjør hava teir, sum eiga og reka Norðborg og Christian, verið óhepnir við skaðum á skipini. Í fjør breyt Norðborg motorin og kom at liggja í einar tríggjar mánaðir, og herfyri brotnaði skrúvan á Christiani.
Hendingin við Christiani fór fram fyri umleið einari viku síðan, meðan skipið var til fiskiskap eftir makreli einar 100 til 150 fjórðingar norðan fyri Føroyar. Tað kendist løgið, tá ristingar komu í skipið, og motorurin steðgaði.
Bogi Rasmussen, sum førir Christian, men sum henda túrin var í landi, sigur, at knappliga fór motorurin niður í umdreiningum, ristingar komið í skipið, og tað endaði við, at motorurin steðgaði.
- Fyrst hugsaði manningin, at okkurt var hent við skrúvuni - at okkurt var komið í skrúvuna, kanska eitt trol ella okkurt heilt annað. Brimil kom skipi og manning til hjálpar, og tá teir sendu eina dronu niður at kanna málið, vísti tað seg, at eitt av bløðunum á skrúvuni stóð í vinkul.
Bogi Rasmussen vísir á, at skrúvan á Christiani hevur fýra bløð, og tað var tað eina blaðið, sum var boygnað.
Brimil sleipaði Christian til Skálar, har skipið varð tikið upp í dokkini. Nú skrúvan er komin úr skipinum, vísir tað seg, at brot er inni í sjálvum skrúvuhøvdinum, og tað sigur skiparin er ikki hent áður í hansara tíð umborð á nøkrum skipi.
- Allar kanningar vísa, at skrúvan hevur ikki borið við nakað, men at hetta er eitt hendiligt óhapp, har brot er inni í sjálvum skrúvuhøvdinum.
Bogi Rasmussen vísir á, at spurningurin síðan hevur verið, hvørji ráð eru til at taka. Tað tekur langa tíð at fáa eina nýggja skrúvu, og tí er avgerð nú tikin um, at skrúvan skal sendast niður til Danmarkar til umvælingar.
- Eg vænti, at skrúvan fer niður í dag, og í Danmark vænta tey, at umvælingin fer at taka umleið eina viku. Vit vænta tískil at missa einar tríggjar vikur í fiskitíð, um alt gongur væl, sigur skiparin á Christiani.
