Ferðin er lækkað, og ferðgáar eru settir upp. Men ein varandi loysn á ferðsluviðurskiftunum við Streymin bíðar framvegis eftir pengum.

Sambært Kringvarpinum er eingin játtan til størri ferðslutrygdarátøk á staðnum, hóast trupulleikin hevur verið til viðgerðar í fleiri ár.

In.fo hevur fleiri ferðir skrivað um vandamikla vegastrekkið. Í mai greiddi Jacob Vestergaard, landsstýrismaður, frá, at ov nógvar íbindingar eru á einum stuttum strekki. Serliga er sýnið frá Norðskála út á høvuðsvegin vánaligt, tí útkoyringin liggur innanvert í einum svingi.

Tá upplýsti hann eisini, at Landsverk metti eina loysn við undirføring undir landsvegin at vera ta bestu. Við henni hevði lokala ferðslan millum Norðskála og Oyrarbakka sloppið undan at koyrt út á høvuðsvegin.

Samlaði kostnaðurin varð mettur til umleið 15 milliónir krónur, sum in.fo skrivaði 28. mai.

Arbeitt hevur verið við einari loysn síðani 2007. Tá kom eitt tilboð upp á 4,2 milliónir krónur, men neyðuga játtanin varð ikki veitt.

Málið varð aftur reist í september, tá Haraldur Símunarson Hammer spurdi landsstýrismannin, um pengar verða settir av á fíggjarlógini fyri 2027, og um ein trygg loysn verður framd í hesum samgonguskeiðinum. Tað skrivaði in.fo 29. september.

Lovisa Glerfoss, stjóri í Ráðnum fyri Ferðslutrygd, sigur við Kringvarpið, at lækkaða ferðin og ferðgáarnir gera mun. Hámarksferðin er lækkað úr 80 niður í 60 kilometrar um tíman, men bilførarar hava framvegis lyndi til at koyra ov skjótt.

Hon vísir samstundis á, at tað er neyðugt at hava viðlíkahald og ferðslutrygd á verandi vegum í huga, tá stórar íløgur verða gjørdar í at byggja vegakervið út.

Bæði rundkoyring og undirføring hava verið umrøddar. Men hóast fleiri uppskot og áralanga viðgerð vantar framvegis fíggingin til eina varandi loysn.