Tá Eyðvør Klakstein varð skift inn í landsdystinum móti Luksemburg í gjár, var hetta samstundis ein nýggjur partur av altjóða fótbóltssøguni. Í føroysku byrjunaruppstillingini var nevnliga eisini Bára Klakstein, ið er mamma at Eyðvør, og tær báðar eru einasta dømi í heiminum um, at tvey ættarlið hava spælt á sama fótbóltslandslið í senn. Eyðvør varð send á vøllin, tá 61. minuttir vóru spældir av dystinum, og seinasta hálva tíman spældi hon soleiðis landsdyst saman við mammuni. Hetta er annars ikki fyrsta ferðin, at tær báðar eru á vølli í senn. Í KÍ hava tær spælt saman seianstu trý kappingarárini, og báðar tvær eru tær eisini við at manna besta kvinnuliðið hjá Stjørnuni. Íslendsku feðgarnir, Arnór og Eiður Smári Guðjohnsen vóru annars nær við, men í útidysti móti Estlandi varð Eiður Smári skiftur inn fyri pápan. Ætlanin var tá, at teir báðir skuldu spæla saman í heimadysti tveir mánaðir seinni, men í U18-landsdysti breyt Eiður Smári beinið, og tá hann aftur var førur fyri at spæla, var pápin ikki longur landsliðsaktuellur.