Tingfundur verður í dag, týsdagin 29. september, klokkan 13.

Eitt av stóru málunum á skránni er uppskotið frá Tjóðveldi um ræðislóg, sum kemur til fyrstu viðgerð. Uppskotið snýr seg um at taka løgreglu, ákæruvald og brotsmálaumsorgan undir føroyskt ræði.

Eisini kemur uppskot um at hækka hámarkið fyri dagpening vegna sjúku til fyrstu viðgerð.

Á skrá er harumframt ein broyting í meirvirðisgjaldslógini, soleiðis at avgjaldsskyldig søla ikki skal fevna um pant.

Løgtingið fer eisini undir fyrstu viðgerð av einum uppskoti um at seta fleiri eldri lógir á hagtalsøkinum úr gildi. Talan er millum annað um lógir um statistikk, prístal og manntalið í 2011.

Fyrsta málið á tingfundinum er tó atkvøðugreiðsla um uppskotið til samtyktar um feriustongd tilboð til børn og vaksin við breki.

At enda verður framløga av nýggjum málum.