Italia fekk av álvara gongd á bæði málskjótingina og Nations League, tá liðið í kvøld vann 4-1 á Turkalandi á útivølli.

Hetta var annar dysturin hjá Roberto Mancini, síðani hann aftur tók við sum italskur landsliðsvenjari.

Fyrsti dysturin endaði við einum 2-0-tapi fyri Belgia í síðstu viku, men í kvøld var heilt øðrvísi lag á italska liðnum.

Italia er í einum sterkum bólki saman við Fraklandi, Belgia og Turkalandi, og tí hevði tað stóran týdning at fáa stig í Turkalandi.

Og italiumenn gjørdu skjótt av.

Alessandro Bastoni legði Italia á odda eftir hornaspark, og síðani átti høgri bakkurin Michael Kayode sín lut í báðum teimum næstu málunum.

Fyrst noyddi hann turkiska málverjan Altay Bayindir at geva returbólt, sum Davide Frattesi gagnnýtti. Stutt eftir fekk Kayode sjálvur møguleikan og økti til 3-0.

Tað vóru ikki farnir 30 minuttir, tá Italia sostatt hevði skorað trý mál.

Turkisku spælararnir vórðu floytaðir av vøllinum av heimafjøldini í hálvleikinum.

Turkaland svaraði skjótt

Bara 75 sekund eftir steðgin minkaði Baris Yilmaz um munin til 1-3 og gav turkum eina lítla vón.

Men hon helt ikki leingi.

Sandro Tonali rakti stongina, og unga Inter-áleyparin Francesco Pio Esposito var fyrstur á returbóltinum og skoraði til endaliga úrslitið 4-1.

Í hinum dystinum í bólkinum vann Frakland 1-0 á Belgia við einum seinum máli.

Fríggjadagin hittast Italia og Frakland, meðan Turkaland skal spæla móti Belgia.

/Ritzau/