Umsorganarheimið Gloria er í ferð við at byggja út, og eftir ætlan verða seks nýggj búpláss tikin í nýtslu 1. mars.

Harvið fer heimið úr átta upp í fjúrtan búpláss.

Útbyggingin hevur við sær tørv á fleiri starvsfólkatímum. Tað sigur leiðslan í eini áheitan til fíggjarnevnd Løgtingsins.

Gloria metir, at tørvur verður á trimum ársverkum afturat. Roknað verður við 600.000 krónum fyri hvørt ársverkið, ella tilsamans 1,8 milliónum krónum árliga.

Í skrivinum verður tó gjørt vart við, at ein eyka náttarvakt ikki er roknað við í hesi upphædd.

Heimið sigur seg vóna at klára økta virksemið við teimum trimum ársverkunum.

Útrokningin tekur støði í heilsurøktarum, men sambært skrivinum starvast vanliga eisini heilsuhjálparar og námsfrøðingar á heiminum.

Tá ið útbyggingin er liðug, verða trý sløg av kømurum á Gloria.

Fýra kømur fáa egið wc og bað umframt balkong. Trý onnur kømur fáa egið wc og bað, meðan sjey kømur hava felags wc og bað.

Leiðslan á Gloria biður nú um fund við fíggjarnevndina fyri at greiða frá broytingunum og tørvinum á øktari starvsfólkafígging.