Avtalan varð samtykt við 16 atkvøðum fyri og sjey tinglimum, sum hvørki atkvøddu fyri ella ímóti. Siumut tók ikki lut í sjálvari atkvøðugreiðsluni, men flokkurin sigur seg taka fult undir við avtaluni.

Avtalan varð undirskrivað í ST-bygninginum í New York 22. september av Grønlandi, Danmark og USA.

Hon hevur síðani verið viðgjørd í Inatsisartut, har serliga Naleraq hevur verið atfinningarsamt.

Flokkurin hevur millum annað funnist at, at Grønland ikki fær beinleiðis fíggjarligt endurgjald fyri amerikansku herstøðirnar, og at grønlendskar fyritøkur ikki hava fingið greiðar tryggingar fyri at fáa arbeiði í sambandi við virksemið á støðunum.

Uttanríkis- og trygdarpolitiska nevndin hevur samstundis mælt til, at ein politiskur fylgibólkur við umboðum fyri allar flokkarnar verður settur. Endamálið er at tryggja politiskt eftirlit, tá ískoytisavtalur verða gjørdar og avtalan verður sett í verk.

Avtalan er sostatt nú góðkend í Grønlandi, men hon er ikki komin endaliga í gildi enn.

Danmark skal eisini avgreiða sín part av málinum.