Grønland má umhugsa, um landið framhaldandi skal luttaka í arbeiðinum hjá Norðurlendska ráðharraráðnum, um Helsingforsavtalan ikki skjótt verður dagførd.

Tað var boðskapurin frá Jens-Frederik Nielsen, grønlendskum stjórnarleiðara, á fundinum hjá norðurlendsku stjórnarleiðarunum í Helsingfors týsdagin.

Sambært Norðurlandaráðnum vísti hann ónøgd og vónbrot um, at arbeiðið at endurnýggja avtaluna dregur út.

Grønland og Føroyar vilja hava møguleika at luttaka á jøvnum føti í norðurlendska samstarvinum. Eisini Beinir Johannesen, løgmaður, fanst á fundinum at drálinum.

Norðurlandaráðið mælti í 2024 til at dagføra Helsingforsavtaluna. Arbeiðið er tó vorðið seinkað, millum annað tí løgfrøðiligir spurningar um støðuna hjá Álandi enn ikki eru loystir.

Allir norðurlendsku stjórnarleiðararnir tóku á fundinum undir við, at Føroyar, Grønland og Áland skulu fáa møguleika at luttaka á jøvnum føti.

Útsøgnin hjá Jens-Frederik Nielsen er ikki ein fráboðan um, at Grønland tekur seg úr samstarvinum, men um at landið má umhugsa sína luttøku, um eingin broyting kemur skjótt.

Kelda: Norðurlandaráðið.