Norska kringvarpið NRK veit at siga, at nú er helst elsta ankar ella ílasteinur, sum er til skjals í Noregi, funnin.

Talan er um ein stein, sum vigar 30 kilo, og sum er funnin á havbotninum við innhøgdum merki kring allan steinin.

At høgt er runt um steinin er fyri, at tað skal bera til at binda í hann og brúka steinin sum ankar ella ílastein.

Steinurin varð funnin í summar á havbotninum við Hesprihólmin, sum liggur lutfalsliga langt úr landi við vesturstrond Noregs.

Norski granskarin, Leif Inge Åstveit, sum starvast við Universitetið í Bergen, sigur, at steinurin líkist ikki øðrum, sum áður er funnið av slíkum slag.

Hann heldur, at steinurin helst er eini 7000 ára gamal og hevur verið brúktur sum skips-ella bátaankar ella sum ílasteinur í steinøldini.

Tað var Forskning.no, sum bar hesa søgu fyrst og norska kringvarpið - NRK - endurgevur eisini søguna.

Meira um gamla og sjáldsama ankar-ella ílasteinin, sum er funnin á havsins botni í Noregi, kann lesast á Forskning.no ella á NRK.no

´