Leivdir av líkinum av einum manni vórðu sunnudagin funnar í Rínánni, nærindis Basel í Sveis.

Sveisiska løgreglan upplýsir, at tað vóru tríggir menn, sum funnu ein posa við einum mannabeini í, tá teir gingu fram við áarbakkanum.

Eftir at kavarar høvdu leitað, og bátar eisini luttóku, fann løgreglan fleiri posar aftrat við likamslutum.

Tað er ógreitt, hvat er hent, men løgreglan ger nú kanningar í málinum.

- Alt bendir á, at talan er um ein mann, sum hevur verið offur fyri harðskapi, sigur løgreglan, sum enn ongan illgruna hevur um, hvør hevur framt brotsverkið.

Hetta veit tíðindastovan NTB at siga í kvøld.