Børn og ung skulu verjast betur móti ávirkanini frá stóru tøknifyritøkunum.

Tað eru átta norðurlendskir stjórnarleiðarar samdir um í eini felags yvirlýsing, sum verður løgd fram í morgin í Helsinki. Yvirlýsingin verður nevnd Marienborg-manifestið, skrivar Politiken sambært Ritzau.

Leiðararnir vísa á, at tøknin ger tað torførari hjá børnum og ungum at hugsavna seg, læra og trívast. Teir vilja tí samskipa lógaruppskot, skifta um hugskot og standa saman mótvegis tøknirisunum.

Sambært yvirlýsingini eru bæði læring, sálarheilsa og menning hjá børnum í váða – og í síðsta enda eisini fólkaræðið og álitið í samfelagnum.

Samgongan vil hava 15 ára aldursmark

Í Føroyum hevur landsstýrissamgongan eisini sett sær fyri at avmarka atgongdina hjá børnum til sosialar miðlar.

Í samgonguskjalinum fyri 2026 stendur:

– Aldursmark á 15 ár skal setast á sosialar miðlar. Snildfon skal úr skúlunum.

Samgongan hevur sostatt bundið seg til bæði eitt aldursmark á sosialum miðlum og at fáa snildfonirnar úr skúlunum.

Í sjálvari orðingini verður tó ikki ásett, nær aldursmarkið skal koma í gildi, ella hvussu tað skal handhevjast.

Danskt aldursmark á veg

Danski forsætisráðharrin, Mette Frederiksen, sigur við Politiken, at tað er ein av týdningarmestu og mest átrokandi uppgávunum at verja børn og ung móti ávirkanini frá tøknifyritøkunum.

Hon vísir á, at fleiri norðurlond arbeiða við strangari reglum og aldursmørkum fyri sosialar miðlar.

Í Danmark hevur ein meiriluti á Fólkatingi gjørt av at seta eitt 15 ára aldursmark. Sambært Ritzau verður roknað við, at tað kemur í gildi 1. juli 2027.

Kjakið um snildfonir og sosialar miðlar hevur millum annað fingið nýggja ferð í sambandi við seinastu Pisa-kanningina.

Hon vísti afturgongd í náttúruvísindum, støddfrøði og lesing tvørtur um norðurlond. Í Danmark vóru úrslitini tey lægstu, síðani landið fyrstu ferð luttók í kanningini í 2000.

Pisa er ein altjóða kanning av førleikunum hjá 15 ára gomlum næmingum.