Ein nærum kilometur langur teinur av Oxford Street í London er mánadagin gjørdur til varandi gongugøtu.
Bussar, hýruvognar, bilar, súkklur og onnur akfør skulu sostatt víkja fyri fólki til gongu á hesum partinum av kendu handilsgøtuni.
Endamálið er at bøta um umstøðurnar hjá bæði handlum og viðskiftafólkum.
Borgarstjórin í London, Sadiq Khan, sigur, at endurnýggjanin skal skapa arbeiðspláss og búskaparvøkstur í bretska høvuðsstaðnum.
Handlarnir á Oxford Street hava havt tað trupult síðani koronufarsóttina, samstundis sum alsamt fleiri keypa á netinum. Fleiri kendir handlar, millum annað House of Fraser og Topshop, eru latnir aftur.
Sambært borgarstjóraskrivstovuni hevur gøtan kortini umleið eina hálva millión vitjandi um dagin.
Gongugøtan er bert ein partur av ætlanunum fyri økið. Í 2027 skulu millum annað fleiri enn 50 trø plantast, 100 sitipláss gerast og tvey almenn torg skipast. Eisini skulu ljós og skelting betrast.
Fram móti jólahandlinum verður tó bert avmarkað byggiarbeiði á gøtuni.
/Ritzau/Reuters/
