Hvat hevði tað kostað landskassanum, um lesandi í Føroyum yvir 18 ár kundu søkt um ferðastuðul eftir somu skipan sum arbeiðstakarar?
Tað spyr Eirikur í Jákupsstovu, løgtingsmaður, Aksel V. Johannesen, landsstýrismann í fíggjarmálum, í einum skrivligum § 52a-fyrispurningi dagfestum 18. november.
Fyrispurningurin byggir á upplýsingar, sum landsstýrismaðurin í mentamálum áður hevur latið Løgtinginum um, hvussu langt lesandi hava til lestrarstaðið, og hvussu nógv teirra eru yvir 18 ár.
Góðir 134.000 undirvísingardagar
Sambært metingini, sum víst verður til í fyrispurninginum, hava lesandi, ið búgva meira enn 15 kilometrar frá lestrarstaðnum, til samans umleið 179.000 dagar um árið við undirvísing á skránni.
Undirvísingarstýrið metir, at umleið ein fjórðingur av hesum lesandi er undir 18 ár. Við støði í tí roknar Eirikur í Jákupsstovu seg fram til góðar 134.000 undirvísingardagar um árið hjá lesandi, sum hava aldur til at taka koyrikort.
Løgtingsmaðurin heldur, at tølini geva fíggjarmálaráðnum grundarlag fyri at gera eina fyribils meting av, hvat tað hevði kostað at víðka ferðastuðulsskipanina til eisini at fevna um lesandi yvir 18 ár.