Hvat hava vit í felag, tá vit siga, at vit eru Norðurlond? Hvat finna vit, um vit seta sjóneykuna á kolonisøguna í Norðurlondum?

Vit eru Norðurlond – eitt dekoloniserandi ritual savnar listafólk úr Føroyum, Grønlandi, Sámalandi, Danmark og Noregi í verki um kolonisering, vald og slóðirnar, ið søgan hevur elvt til í Norðurlondum.

Leikmyndin er eitt livandi landslag, sum samiska myndlistakvinnan Stina Aletta Aikio hevur gjørt. Jørð, vøkstur og glas eru partur av pallmyndini, og leikarar og áskoðarar flyta, skapa og upploysa jørðina saman. Tónleikur, tekstur og kroppur gerast partur av saman rúmi.

Leikurin er spældur ymsastaðni í Norðurlondum, og verður á hvørjum staði til nakað nýtt við staðbundnum listafólki, ið er við sum gestur. Í Føroyum verður Gunnvá Zachariasen við. Sýningin hevur eisini ein annan føroying við: Tónaskaldið Tróndur Bogason hevur gjørt tónleikin til verkið.Vit eru Norðurlond – eitt dekoloniserandi ritual hevði frumsýning á tjóðleikhúsinum í Nuuk í 2023 og hevur síðani verið spældur bæði í Noregi, Sámalandi, Finnlandi og Danmark.

Atgongumerki kunnu keypast á nlh.fo