Mike Johnson, formaður í amerikanska Umboðsmannatinginum, hevur boðað starvsfólkum sínum frá, at hann ikki heldur fram sum leiðari hjá Republikanarunum í tinginum, tá nývalda Kongressin tekur við.

Tað váttar talsfólk hansara fyri tíðindastovuni AFP.

Fleiri miðlar bóru fyrr øi dag tíðindini um avgerðina. Tá AFP spurdi talsfólkið, um tað var rætt, at Johnson leggur frá sær, var svarið stutt:

– Tað er rætt.

Avgerðin kemur, eftir at Republikanararnir á miðskeiðsvalinum í gjár mistu meirilutan í báðum kømurunum í Kongressini, Senatinum og Umboðsmannatinginum.

Demokratarnir vunnu fram í fleiri statum, sum vanliga velja republikanskt.

54 ára gamli Mike Johnson hevur verið formaður í Umboðsmannatinginum síðan 2023. Hann varð sjálvur afturvaldur á valinum týsdagin.

Nýggjur leiðari skal veljast

Sambært NBC News væntast republikansku limirnir í Umboðsmannatinginum at velja nýggjan minnilutaleiðara 10. november.

Tá nýggja Kongressin kemur saman í januar, verður roknað við, at leiðarin hjá Demokratunum, Hakeem Jeffries, verður valdur til formann í Umboðsmannatinginum og sostatt tekur við sessinum hjá Johnson.

Johnson hevði rikið eitt umfatandi valstríð fyri at varðveita tepran republikanskan meiriluta. Hann hevði áður lagt upp til, at hann møguliga fór at halda fram sum leiðari hjá flokkinum, eisini um Demokratarnir vunnu meirilutan.

Sambært AFP kann avgerðin hjá Johnson nú leggja upp til eina uppgerð millum núverandi meirilutaleiðaran, Steve Scalise, og formannin í rættarnevndini, Jim Jordan.

Báðir eru konservativir republikanarar og trúfastir stuðlar hjá Donald Trump.

/ritzau/