Avtalan um keypið av uppisjóvarskipinum Biritu við veiðiloyvi og øllum fiskirættindum er nú fráboðað Kappingareftirlitinum.

Tað boðar eftirlitið frá á heimasíðu síni í dag.

Tað eru P/f Jókin og P/f Vestmanna Fiskavirki, sum í felag hava gjørt avtalu við Sp/f Gráastein um keypið.

Sambært fráboðanini er ætlanin at býta fiskirættindini hjá Biritu millum keypararnar. Rættindini skulu síðani gagnnýtast av teimum skipum, sum feløgini frammanundan eiga.

Fráboðanin sigur ikki, hvussu rættindini skulu býtast millum feløgini, ella hvat síðani verður av sjálvum skipinum.

Yvirtøkan skal fráboðast Kappingareftirlitinum, tí umsetningurin hjá pørtunum er oman fyri mørkini í kappingarlógini.

Eftirlitið hevur nú sett freist fyri møguligum viðmerkingum til yvirtøkuna. Tær skulu vera eftirlitinum í hendi í seinasta lagi 9. november 2026.

Kappingareftirlitið upplýsir, at samskiftið við eftirlitið er í trúnaði.

Fráboðanin er ikki ein kunngerð um, at yvirtøkan er góðkend.