Mette Frederiksen hevur ikki ætlanir um at gevast í donskum politikki eftir hetta valskeiðið.
Tað gjørdi hon greitt í formansrøðu síni á ársfundinum hjá Socialdemokratiet í Aalborg í dag.
– Um tit eru við upp á tað, so verði eg verandi, segði hon við limirnar.
– Eg ætli mær at brúka mítt politiska virksemi og arbeiði í hesum valskeiðnum – og í tí næsta, um vit aftur fáa undirtøku frá veljarunum til at leiða landið, segði Mette Frederiksen.
Hon segði tó ikki, hvat hon fer at gera, um Socialdemokratiet ikki fær undirtøku til aftur at standa á odda fyri einari stjórn.
Mette Frederiksen hevur verið forsætisráðfrúa í Danmark síðani 2019 og er nú í sínum triðja valskeiði.
Síðani nýggja stjórnin varð skipað í juni, hevur nógv verið gitt um, hvør einaferð skal taka við eftir hana. Hetta tók serliga dik á seg, tá Mette Frederiksen býtti um upp á ráðharrasessirnar hjá Nicolai Wammen og Peter Hummelgaard.
Hummelgaard gjørdist fíggjarmálaráðharri, meðan Wammen gjørdist løgmálaráðharri. Teir báðir hava verið nevndir sum møguligir arvtakarar eftir Mette Frederiksen.
Men sambært røðuni í dag er eitt formansskifti ikki á skránni enn.
Vil vinna veljararnar aftur
Mette Frederiksen ásannaði eisini, at hon ikki er nøgd við úrslitið hjá Socialdemokratiet á fólkatingsvalinum í mars.
Flokkurin misti 12 fólkatingssessir, hóast hann framvegis er størsti flokkur í Danmark.
– Mín uppgáva sum forsætisráðfrúa er at leiða land okkara og stjórn okkara. Men eg vil eisini gera tað, eg kann, fyri at leiða okkum aftur til nøkur av tykkum, sum vit eru komin ov langt burtur frá, segði hon.
Ein tilgongd er tí sett í verk fyri at vinna mistar veljarar aftur.
– Tí vit eru og vilja vera ein breiður fólksligur flokkur, segði Mette Frederiksen.
Vil herða krøvini til tøknirisarnar
Í formansrøðuni brúkti Mette Frederiksen eisini nógva tíð upp á sosialar miðlar, vitlíki og stóru tøknifyritøkurnar.
Hon vil venda lóggávuni á økinum við, soleiðis at tøknirisarnir frammanundan skulu prógva, at teirra tænastur ikki eru skaðiligar fyri børn.
– Í staðin fyri at vit aftaná, tá skaðin er hendur, skulu royna at gera ein ábyrgd galdandi, segði Mette Frederiksen.
/Ritzau/
