Tað vísir úrslitið av eini vegleiðandi fólkaatkvøðu, sum varð hildin í gjár.

Atkvøðugreiðslan fevndi um Nanortalik og bygdirnar Narsarmijit, Aappilattoq, Tasiusaq, Ammassivik og Alluitsup Paa.

Sambært grønlendska kringvarpinum KNR atkvøddu 680 fólk, og valluttøkan var 62,2 prosent. Ein greiður meiriluti tók undir við, at økið verður skilt frá Kommune Kujalleq.

Úrslitið merkir tó ikki, at nýggj kommuna verður stovnað beinanvegin. Talan var um eina vegleiðandi fólkaatkvøðu, og endaliga avgerðin um kommunubýtið skal takast politiskt á landsstigi.

Nanortalik var sjálvstøðug kommuna fram til kommunuumskipanina í Grønlandi í 2009. Tá vórðu 18 kommunur lagdar saman í fýra stórkommunur. Nanortalik varð tá partur av Kommune Kujalleq saman við Qaqortoq og Narsaq.

Kommune Kujalleq fevnir um Suðurgrønland og hevur í fleiri ár verið merkt av kjaki um stórar frástøður, tænastustøði og um tað er ov langt millum borgaran og kommunalu fyrisitingina.

Við fólkaatkvøðuni hava borgararnir í Nanortalik-økinum nú givið eitt greitt signal um, at teir heldur vilja hava eina minni og meira lokala kommunu.

Málið skal nú víðari til grønlendsku politisku skipanina, sum skal taka støðu til, um kommunumarkini skulu broytast.