Tað skrivar Búskaparráðið í morgun:
Í talvu 1 eru útrokningar av inntøku eftir skatt og avgjøld gjørd fyri tríggjar ymiskar persónar, sum forvinna tað sama á arbeiðsmarknaðinum. Ein stakur pensjónistur, ein giftur pensjónistur og ein vanligur løntakari, sum enn ikki hevur nátt pensjónsaldur, forvinna allir tað sum svarar til eina miðinntøku (nærum 409 tkr.).
Eftir skattir, avgjøld og veitingar frá tí almenna, er tøka inntøkan hjá hesum trimum persónunum tó ikki tann sama.
Løntakarin, ið ikki hevur nátt pensjónsaldurin, hevur um 253 tkr. eftir tá ið skattir og avgjøld eru goldin.
Gifti pensjónisturin hevur til samanbering um 333 tkr. eftir tá ið skattir og avgjøld eru goldin, meðan staki pensjónisturin hevur nærum 350 tkr.
Allir tríggir forvinna somu upphædd í arbeiðsinntøku (409 tkr.), men pensjónisturin hevur meira eftir, tá ið skattir og avgjøld eru goldin, enn vanligi løntakarin hevur.
Munurin stavar frá sosialum veitingum og skattligum fyrimunum. Pensjónistar sleppa undan at gjalda inn í ALS, AMEG og Barsilsgrunnin, hava lægri kringvarpsgjald og fáa ein serstakan skattafrádrátt á 6.000 kr. árliga.
Dømið í talvuni vísir, at ov lin mótrokning elvir til sosialan ójavna millum arbeiðandi pensjónistar og aðrar løntakarar.
Ov lin mótrokning elvir eisini til sosialan ójavna pensjónistanna millum. Tað kemur av, at ein ov lítil mótrokning ger munin millum tey niðurslitnu, ið ikki hava møguleika at arbeiða eftir pensjónsaldur, og tey, sum eru væl fyri at arbeiða eftir pensjónsaldri, størri enn rímiligt.
Harumframt elvir ov lin mótrokning til sosialan ójavna millum ættarlið. Tað kemur av, at ung fólk, ið hava lutfalsliga lága inntøku og møguliga bústaðarskuld og børn at forsyrgja, gjalda skatt, sum verður brúkt til at gjalda fólkapensjón til pensjóninstar, ið hava hægri inntøku, tá ið skattir og avgjøld eru goldin.
Talva 1 Tøk inntøka hjá støkum og giftum pensjónisti, og løntakara undir pensjónsaldur
Viðm.: Landsskattur, arbeiðsmarknaðargjøld (ALS, AMEG, Barsilsgrunnur og Heilsutrygd) og Kringvarpsgjald er útroknaður við galdandi skattatalvum og -satsum á heimasíðuni hjá TAKS, meðan kommunu- og kirkjuskattur er eitt miðal fyri landið. Kelda: Hagstovan, ABMR, TAKS og egnar útrokningar.
Sí brot frá framløguni av haldførisfrágreiðingini her.
Les meira í haldførisfrágreiðingini hjá Búskaparráðnum her.
