663,8 millimetrar av regni eftir bert 37 tímum.
So nógv avfall varð mált í býnum Pego í Alicante-landspartinum, tá ódnarveðrið Adam rakti eystara part av Spania millum 18. og 20. oktober. Tað er næstan líka nógv, sum vanliga fellur í býnum eitt heilt ár.
Tað skrivar evropeiska jarðeygleiðingarskipanin Copernicus við støði í tølum frá sponsku veðurstovuni.
Glopraregnið elvdi til umfatandi vatnflóðir í Valencia-økinum. Serliga hart rakt vóru strandarøkini La Safor og Marina Alta. Í millum annað Gandia, Oliva og Pego stóðu vegir, landbúnaðarjørð og bústaðarøki undir vatni.
Slóðirnar síggjast úr rúmdini
Ein mynd, sum ein av Sentinel-2-fylgisveinunum tók 21. oktober, vísir greiðar slóðir eftir vatnflóðirnar fram við strondini úr Valencia og suðureftir.
Á myndini síggjast stórir turkisbláir geirar í sjónum. Liturin stavar frá mold og øðrum tilfari, sum áir og vatn av landi hava ført út í havið. Geirarnir standa sjónliga fram ímóti tí myrkabláa Miðjarðarhavinum longri úr landi.
Ein nærmynd vísir eisini brúnt, gruggut vatn í Marjal de Pego-Oliva. Hetta er eitt friðað vátlendi við strondina, har partar eisini vanliga eru vatnfjaldir.
Fylgisveinar hjálpa tilbúgvingini
Eftir áheitan frá sponskum myndugleikum hevur neyðtænastan hjá Copernicus gjørt kort yvir vatnflóðirnar og mett um skaðarnar í La Safor og Marina Alta.
Kortini skulu hjálpa myndugleikunum at fáa yvirlit yvir støðuna og leggja bjargingar- og hjálpararbeiðið til rættis.
