Javnaðarflokkurin fær fýra, Tjóðveldi fær trý og Framsókn fær tvey. Harumframt fær Tjóðveldi løgtingsformannin.

Greitt er, Aksel V. Johannesen verður løgmaður. So ljóðar at Ingilín Strøm verður landsstýriskvinna í umhvørvis- og orkumálum. At Margit Stórá verður landsstýriskvinna í heilsumálum.

Tað ljóðar, at Bjørt Samuelsen verður landsstýriskvina í vinnumálum, Høgni Hoydal í uttanlandsmálum og Dennis Holm í fiskvinnumálum.

Tað ljóðar eisini frá keldum, at annaðhvørt Bjørt Samuelsen ella Høgni Hoydal kann gerast løgtingsformaður

Ruth Vang verður landsstýriskvinna í fíggjarmálum, og at annaðhvørt Bjarni Kárason Petersen ella Hanna Jensen verður landsstýrisfólk í innlendismálum.

Alt hetta vita vit meira um, tá tingfundur verður klokkan 10. Vanligt hevur verið, at løgmaður boðar frá, hvørji landsstýrisfólkini vera á tingfundinum, hóast hann ikki tilnevnir tey fyrr enn á mótøku í Tinganesi klokkan 14 seinnapartin.

Miðaltalið av landsstýrisfólki síðani 1998, tá fyrsta landsstýrið varð tilnevnt eftir nýggju stýrisskipanarlógini hevur verið átta. Fýra ferðir hava átta fólk sitið í landsstýrinum. Tvær ferðir sjey fólk og tvær ferðir níggju fólk.

Verður tað so, at flokkarnir finna øll fólkini úr tingmanningunum, so koma hesi níggju fólk á ting sum føst varafólk fyri landsstýrisfólkini:

Fyri Javnaðarflokkin:

1. Súsanna Bertholdsen, 275 atkvøður
2. Kristianna Winther Poulsen, 205 atkvøður
3. Hans Jacob Thomsen, 189 atkvøður
4. Kim Durhuus, 161 atkvøður

Fyri Tjóðveldi:

1. Eirikur í Jákupsstovu, 295 atkvøður
2. Liljan Weihe, 290 atkvøður
3. Erling Eidesgaard, 216 atkvøður

Fyri Framsókn:

1. Karlot Hergeirsson, 155 atkvøður
2. Hanna Jensen, 111 atkvøður

Um Hanna Jensen verður landsstýrisfólk, so kemur Karlot Hergeirsson einsamallur sum varamaður fyri Framsókn.