Heimasíðan hjá norska Stórtinginum varð í dag rakt av einum telduálopi. Tað skrivar norski miðilin VG.

Sambært miðlinum hevur prorussiski teldusníkabólkurin „Server Killers“ sett eitt sokallað DDoS-álop í verk.

Við einum DDoS-álopi verður ein heimasíða ovbyrjað, tá ið nógvar eindir samstundis senda sera nógva ferðslu inn á síðuna.

Bólkurin hevur á boðtænastuni Telegram tikið ábyrgdina av álopinum.

Trupulleikarnir við heimasíðuni byrjaðu um klokkan 15. Síðan hevur annaðhvørt verið óvirkin ella ikki tøk hjá teimum, sum hava roynt at vitja hana.

Bjarne Østby, deildarleiðari á KT-deildini hjá Stórtinginum, váttar trupulleikarnar fyri norsku tíðindastovuni NTB.

– Vit uppliva ávísan óstøðugleika á heimasíðuni og arbeiða við tiltøkum, sum skulu gera hana støðuga aftur, sigur hann.

Hann váttar tó ikki, at talan er um eitt telduálop.

„Server Killers“ skrivar á Telegram, at álopið fer at vara í tríggjar tímar. Bólkurin sigur seg eisini hava framt álop á fleiri norsk universitet og hægri lærustovnar fyrr í september.

Álopini koma, eftir at bólkurin síðst í august lýsti „teldukríggj“ móti Noregi. Orsøkin skal vera norski stuðulin til Ukraina og verjusamstarvið við landið.

Bólkurin hevur verið virkin síðan 2023 og er sambært VG serliga kendur fyri álop á myndugleikar og almennar tænastur.

Stórtingið hevur áður verið fyri telduálopum. Í 2020 varð norska tjóðartingið rakt av einum umfatandi KT-álopi, skrivar NTB.

/Ritzau/