Tað vil Ruth Vang hava landsstýriskvinnuna í heilsumálum at svara.

Ruth Vang, løgtingskvinna, hevur sett Eyðdis Hartmann Niclasen, landsstýriskvinnu í heilsumálum, ein skrivligan fyrispurning um rættindini hjá fólki, sum búgva í Føroyum, men arbeiða í Noregi og rinda til norsku fólkatrygdina NAV.

Sambært norðurlendska sáttmálanum kunnu hesi fólk sleppa undan at rinda heilsutrygdargjald í Føroyum, tí tey longu rinda til eina tryggingarskipan í arbeiðslandinum.

Men Ruth Vang vil hava greiðu á, um tey kortini hava somu rættindi til veitingar frá Heilsutrygd sum fólk, ið rinda føroyskt heilsutrygdargjald.

Hon spyr millum annað, um tey hava rætt til ókeypis læknaviðtalu og stuðul til heilivág, tannlækna, fysioterapi, kiropraktor og aðrar heilsutænastur.

Kann Heilsutrygd krevja pengar frá Noregi?

Ein annar spurningur snýr seg um, hvør í síðsta enda skal gjalda fyri tænasturnar.

Ruth Vang vil vita, um norska NAV endurrindar Heilsutrygd útreiðslurnar til heilsuveitingar hjá fólki, sum eru tryggjað í Noregi.

Hon spyr eisini, um norðurlendski sáttmálin gevur Heilsutrygd rætt til at krevja slíkt endurgjald.

Í viðmerkingunum til fyrispurningin vísir hon á, at um NAV ikki longu endurrindar útreiðslurnar, kann spurningurin vera, um Heilsutrygd hevur ein endurgjaldsrætt, sum ikki verður nýttur.

Ógreiða um skipanina

Ruth Vang vísir á, at spurningurin er sprottin úr tingviðgerðini av viðurskiftunum hjá fólki, sum rinda til NAV í Noregi og tí sleppa undan at rinda heilsutrygdargjald í Føroyum.

Undir viðgerðini komu fleiri ymisk sjónarmið fram millum tingfólk um, hvussu skipanin virkar, og hvussu hon eigur at virka.

Tí vil hon nú hava landsstýriskvinnuna at greiða frá bæði rættindunum hjá hesum borgarum og fíggjarligu viðurskiftunum millum Heilsutrygd og norsku fólkatrygdina.