Tá ið Løgtingið kemur saman í morgin, hósdagin 22. oktober, klokkan 11, eru bæði fíggjarlig hjálp til húski og fleiri heilsumál á skránni.
Fundurin byrjar við ófráboðaðum fyrispurningum. Síðan kemur uppskotið hjá Jenisi av Rana og Steffani Klein Poulsen um aðrar ansingarloysnir til aðru viðgerð.
Uppskotið skal geva kommunum heimild at lata ískoyti til millum annað heimaansing og privata dagrøkt. Ískoytið skal í mesta lagi vera 70 prosent av rakstrarkostnaðinum fyri kommunala stovnsplássið, sum barnið annars hevði fingið í boði. Við heimaansing skal ískoytið rindast sum A-inntøka, og 15 prosent í eftirløn skulu leggjast afturat.
Men ein samd Mentanarnevnd mælir Løgtinginum frá at samtykkja uppskotið. Nevndin vísir millum annað á ivamál um eftirlit, góðskutrygd, javnstøðu og fíggjarligu og sosialu avleiðingarnar fyri familjur. Hon vil heldur bíða eftir komandi broytingum í barsilsskipanini.
Vil lata 5.000 krónur aftrat
Margit Stórá, landsstýriskvinna, hevur lagt fram uppskot um at lata upp fyri einum nýggjum umsóknarumfari til orkuískoyti í ár.
Verður uppskotið samtykt, kunnu húski, sum lúka treytirnar, søkja um 5.000 krónur aftrat. Tað verður ikki ein treyt at hava fingið orkuískoyti fyrr í ár, men øll skulu lata inn nýggja umsókn. Skotið verður upp, at umsóknarfreistin í seinna umfarinum verður 25. november.
Endamálið er at hjálpa húskjum við lágum inntøkum og avmarkaðari ogn, nú orkukostnaðurin er høgur. Málið kemur til fyrstu viðgerð.
Berarakanningar og hjálp eftir føðing
Eisini kemur eitt uppskot frá Eyðdis Hartmann Niclasen, landsstýriskvinnu, til fyrstu viðgerð. Tað skal geva fólki millum 18 og 45 ár og makum hjá berarum møguleika at kanna, um tey bera arvaligar ílegusjúkur.
Tilboðið skal fevna um sjúkur, sum í høvuðsheitum ikki kunnu viðgerast, hava høgan títtleika í Føroyum og eru deyðiligar. Ætlanin er, at lógin skal koma í gildi 1. apríl 2027.
Hervør Pálsdóttir hevur vegna Tjóðveldi lagt fram uppskot um eina tvørfakliga eftirføðingarklinikk. Í sjálvum uppskotinum verður heitt á landsstýrið um at kanna møguleikarnar og leggja eina frágreiðing fyri Løgtingið.
Hugsanin er at fáa eitt samanhangandi tilboð til kvinnur, sum hava kropsligar ella sálarligar trupulleikar eftir barnsburð. Fleiri fakbólkar skulu kunna samstarva um hjálpina og uppfylgingina. Eisini hetta málið kemur til fyrstu viðgerð.
Landsapotekaraembætið skal takast av
Løgtingið fer harumframt at hava fyrstu viðgerð av einum uppskoti um at taka landsapotekaraembætið av.
Rakstraruppgávurnar skulu leggjast til Apoteksverkið og eftirlitsuppgávurnar til Heilsustýrið. Samstundis skal kravið um farmaseutiskt kandidatprógv ikki førast víðari til stjóran fyri Apoteksverkið. Sambært uppskotinum skal stjórin kunna hava aðra viðkomandi útbúgving.
Broytingin skal millum annað skilja rakstur og eftirlit sundur.
Á skránni er eisini umrøða av skrivliga fyrispurninginum hjá Eiriki í Jákupsstovu um ferðing hjá lesandi og lærlingum. Fundurin endar sambært skránni við framløgu.
