Liðini hjá Hákuni West av Teigum og Jóhan á Plógv Hansen, Füchse Berlin og Skanderborg Aarhus vóru í kvøld bæði fyri tapum í innleiðandi bólkaspælinum í Champions League.

Hákun og liðfelagarnir í Füchse Berlin taptu í Ungarn 35-39 fyri Veszprem í innleiðandi bólki A. Tað haltaði serliga í fyrra hálvleiki hjá Füchse Berlin, og var heimaliðið á odda 20-13 í steðginum.

Hákun skoraði tvey mál upp á tríggjar málroyndir.

Veszprem er fremst í bólkinum við 10 stigum, og teir hava vunnið bólkin. Füchse Berlin er nummar tvey við seks stigum, og teir hava vunnið seg víðari í kappingini. Porto hevur trý stig og Partizan Beograd hevur eitt stig, nú bert eitt leikumfar er eftir at avgreiða í bólkinum.

Jóhan á Plógv Hansen og liðfelagarnir í Skanderborg-Aarhus fingu bank í dysti í innleiðandi bólki E. Heimaliðið, Dinamo Bukarest vann 37-23 á Skanderborg-Aarhus. Í steðginum var rumenska liðið á odda 16-12.

Jóhan skoraði tvey mál upp á fimm málroyndir.

Barcelona er fremst í bólkinum við átta stigum fyri fýra dystir. Skanderborg-Aarhus hevur fimm stig, og Dinamo Bukarest hevur trý stig, bæði fyri fimm dystir. Aftast er Montpellier við tveimum stigum fyri fýra dystir.

Hóskvøldið 29. oktober hevur Skanderborg-Aarhus torføran dyst á heimavølli móti Barcelona í sætta og seinasta leikumfarinum.