Fólkaflokkurin styrkir støðu sína sum størsti flokkur á tingi.
Tað vísir ein nýggj veljarakanning, sum Spyr.fo gjørdi fyri Portal.fo 20. oktober. Kanningin byggir á svar frá 500 veljarum, skrivar Portal.fo.
Fólkaflokkurin fær 29,7 prosent í kanningini. Tað eru trý prosentstig meira enn á løgtingsvalinum 26. mars, tá flokkurin fekk 26,7 prosent.
Sambært sessabýtinum hjá Portal.fo hevði hetta givið Fólkaflokkinum tíggju tingfólk í staðin fyri tey níggju, flokkurin fekk vald í mars.
Sambandsflokkurin missir ein sess
Sambandsflokkurin hevur størstu afturgongdina í prosentstigum. Flokkurin fær 18,9 prosent í kanningini samanborið við 21,5 prosent á valinum.
Tað er ein afturgongd á 2,6 prosentstig og hevði sambært Portal.fo kostað flokkinum ein av teimum sjey tingsessunum.
Sambandsflokkurin og Javnaðarflokkurin eru sostatt nærum javnstórir í kanningini. Javnaðarflokkurin fær 18,8 prosent og stendur nærum í stað samanborið við valið, tá flokkurin fekk 18,9 prosent. Báðir flokkar standa til seks tingsessir.
Tjóðveldi fær 18,1 prosent, sum eru 0,7 prosentstig meira enn á valinum. Flokkurin varðveitir sambært kanningini sínar seks sessir.
Framsókn gongur aftur
Miðflokkurin fær 6,2 prosent og er størstur av teimum trimum smærru flokkunum. Á valinum fekk flokkurin 5,3 prosent.
Framsókn fær hinvegin 4,9 prosent samanborið við 6,6 prosent á valinum. Roknað út frá tølunum við einum desimali er afturgongdin 1,7 prosentstig.
Sjálvstýri fær 3,5 prosent samanborið við 3,6 prosent á valinum.
Sambært Portal.fo varðveita Miðflokkurin og Framsókn tveir sessir hvør, meðan Sjálvstýri varðveitir sín eina.
Fleiri hava ikki tikið støðu
Í kanningini siga 12,3 prosent seg ikki vita, hvar tey høvdu sett krossin. Harumframt siga 2,6 prosent, at tey høvdu atkvøtt blankt, og 0,8 prosent, at tey ikki høvdu farið á val.
