Var fólkatingsval í Danmark nú, hevði Venstre fingið 7,1 prosent av atkvøðunum.

Tað vísir ein nýggj veljarakanning, sum Epinion hevur gjørt fyri DR. Síðani seinastu mátingina í august er Venstre farið 2,2 prosentstig aftur. Tað er næstlægsta úrslitið hjá flokkinum í eini Epinion-máting síðani 2008.

Samstundis gongur Dansk Folkeparti fram. Flokkurin hjá Morten Messerschmidt fer úr 12,3 upp í 14,3 prosent og hevur sostatt í mátingini tvífalt so stóra undirtøku sum Venstre.

Tað er ein stór broyting síðani fólkatingsvalið í mars. Tá fekk Venstre 10,1 prosent og var størsti flokkur í bláa blokki. Í nýggju mátingini liggja bæði Dansk Folkeparti, Liberal Alliance, Konservative og Danmarksdemokraterne framman fyri Venstre.

Mátingin kemur eftir innanhýsis ósemju í Venstre. Fimm fólkatingslimir hjá flokkinum, teirra millum Søren Gade, atkvøddu herfyri ímóti flokslinjuni í málinum um donsku tøðlógina. Politiski framsøgumaðurin hjá Venstre, Sophie Løhde, sigur við DR, at ófriðurin í flokkinum kann vera ein orsøk til afturgongdina.

Eisini SF gongur aftur í mátingini og fær 10,4 prosent. Sambært DR er hetta lægsta máting hjá flokkinum síðani 2022.

Kelda: DR/Epinion