Tað endaði 1-1, tá ið ÍF í kvøld á nýggja graslíkinum í Fuglafirði hevði vitjan av teimum næstbestu hjá HB.

Fýra minuttir undan leikloki javnaði HB til 1-1, eftir at ÍF tveir minuttir undan steðginum legði seg á odda. Málskjútti hjá ÍF var Mikkel Elbæk Jakobsen, sum skoraði fyri triðju ferð í ár. Uppleggið átti Jákup í Lambanum.

Hóast heimaliðið var væl meiri í álopsstøðu og vann fleiri hornaspørk, so eydnaðist tað ikki at økja um leiðsluna, og so var tað fýra minuttir undan leikloki, at innskifti Rani Wenningsted Sørensen skoraði. Hetta var annað málið hjá Rana í ár.

Eina stigið, sum HB hevði við sær suður aftur ber við sær, at HB lyfti seg uppum niðurflytingarstrikuna. HB hevur 22 stig og betri málmun enn FC Hoyvík, sum klokkan 13 í morgin fer at spæla á útivølli ímóti TB.

ÍF er á fjórða plássi við 37 stigum. Næsti dystur hjá ÍF verður leygardagin 10. oktober á heimavølli ímóti TB.

Næsti dystur hjá HB verður leygardagin 10. oktober á útivølli ímóti FC Suðuroy.