Landsliðsmálverjin, Mattias H. Lamhauge og liðfelagarnir í Strømsgodset liggja nú á einum beinleiðis uppflytingarplássi í næstbestu norsku fótbóltsdeildini.
Í kvøld spældi Strømsgodset toppdyst móti Kongsvinger á Marienlyst leikvøllinum í Drammen. Strømsgodset vann stórsigur 5-1. Í fyrra hálvleiki syrgdi tann í Føroyum væl kendi Sebastian Pingel fyri einum reinum hattricki aftaná Herman Stengel hevði lagt heimaliðið á odda longu í øðrum minutti av dystinum. Í 79. minutti økti Marcus Mehnert til 5-0 áðrenn Kongsvinger slapp at pynta um úrslitið við einum brotssparksmáli.
Nú fýra umfør eru eftir er Haugesund fremst í deildini við 59 stigum. Strømsgodset hevur 57 stig á øðrum plássinum, og Kongsvinger hevur 56 stig á triðja plássinum. Stabæk er nummar fýra við 49 stigum.
Júst Stabæk vann á heimavølli 4-1 á liðnum hjá Gullbrandi Øregaard og Olafi Bárðarsyni, Sandnes ULF. Olaf var saman við tveimum øðrum viðleikarum skiftur út aftaná steðgin.
Sandnes ULF er fjórðaftast í deildini við 26 stigum.
Sunnudagin klokkan 13.30 hevur Strømsgodset aftur toppdyst á Marienlyst leikvøllinum. Tá kemur oddaliðið, Haugesund á vitjan. Sama dag klokkan 16 spælir Sandnes ULF dyst á útivølli móti Kongsvinger. Gullbrandur og Olaf kunnu við einum sigri hjálpa bæði sínum egna liði, og liðnum hjá Mattiasi.
