Fyrr í dag spældi føroyska kvinnulandsliðið suðuri í Andorra venjingardyst móti vertstjóðini.

Fyri bert trimum døgum síðani vunnu okkara 5-0 (1-0) á Andorra.

Undan dagsins dysti høvdu Føroyar vunnið seks av seks dystum á Andorra. Tríggjar kappingardystir og tríggjar venjingardystir høvdu okkara vunnið á liðnum úr lítla fjallalandinum, ið liggur millum Frakland og Spania, har katalanskt er høvuðsmálið.

Føroyar høvdu eisini undan dagsins dysti eina tunga favorittstøðu hjá veddingarfyritøkunum, har hægstu oddsini fyri føroyskum sigri vóru 1,28, meðan lægstu oddsini fyri andorianskum sigri vóru 8,00.

Tað sum tó ger fótbóltin so spennandi er, at óvæntað úrslit henda. Og í dag hendi eitt slíkt: Andorra vann 2-1 á Føroyum.

Í 16. minutti legði Teresa Morato heimaliðið á odda. Jensa Tórálvsdóttir javnaði í øðrum minutti í seinna hálvleiki. Men eitt korter seinni fekk Maria Da Cruz aftur heimaliðið á sigurskós.

Sum enski landsliðsvenjarin, Walter Winterbottom segði undir HM-endaspælinum í Brasil í 1950 aftaná Ongland hevði tapt 0-1 fyri USA, ið tá var tað mest óvæntaða landsliðsúrslitið í søguni: "Tað vakra við fótbólti er, at stór yvirraskilsi henda. Tað er bara ikki so stuttligt at vera skeivu megin stóra yvirraskilsi".

HESAR byrjaðu inni fyri Føroyar: