Tvey føroyingalið vóru í leiki í bestu donsku kvinnudeildini í hondbólti í kvøld.

Marita Mortensen vann saman við liðfeløgunum í Nykøbing-Falster á heimavølli stórsigur 30-19 á gamla liðnum hjá Maritu, HØJ. Í steðginum var NFH á odda 13-8.

Marita skoraði trý mál upp á fimm málroyndir.

Nykøbing-Falster er fjórðfremst í deildini við níggju stigum.

Jana Mittún og liðfelagarnir í Viborg máttu á útivølli lúta greitt 24-33 fyri toppliðnum, Odense, ið var á odda 17-13 í steðginum.

Jana skoraði tvey mál upp á fimm málroyndir. Hon legði upp til tvey mál og vann eisini liðnum eitt brotskast.

Viborg er nummar sjey í deildini við sjey stigum.

Leygardagin klokkan 13 verður føroyingauppgerð. Tá taka Rakul Wardum og liðfelagarnir í Skanderborg á heimavølli móti liðnum hjá Mariu P. Nólsoy, Keypmannahavn.